ᑖᓐᓇᓪᓗᐊᐸᓗᒃ ᐊᓯᕈᐃᔪᑦ ᑲᑎᒪᓯᓐᓈᖅᑎᑦᑎᓂᑦ
ᐅᑭᐅᖅᑕᖅᑐᕐᒥ ᓂᕿᓂᑦ ᐋᖅᑭᒋᐊᖅᓯᓂᖅ ᐱᓕᕆᐊᖑᓇᓱᒋᐊᓕᒃ
ᐱᓕᕆᐊᖑᕙᓪᓕᐊᓂᖓ I
ᐊᐃᕆᓕ 11-13, 2022
ᐃᓗᓕᖏᑦ
ᓇᐃᓈᕈᑎᖓ ᐊᒻᒪᓗ ᓇᓪᓕᐊᒃ ᐱᓕᕆᐊᖑᓇᓱᓪᓗᐊᑕᕆᐊᖃᕐᓂᐊᕐᒪᖔᑦ
ᑎᓯᐱᕆ 2021−ᒥ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᑦ (CanNor) ᑐᒃᓯᕋᓚᐅᕐᒪᑕ ᑭᐅᔭᐅᔪᒪᓪᓗᑎᒃ ᑐᒃᓯᕌᖑᓯᒪᓂᖏᓐᓂᑦ "ᐊᓯᕈᐃᔪᑦ ᑲᑎᒪᓯᓐᓈᖅᑎᑦᑎᓂᐅᔪᓂᑦ" ᑕᐃᒃᑯᓇᖓᑦ ᖁᓕᐅᖏᓱᖓᖅᑐᓂᑦ ᓄᑖᕈᕆᐊᖅᓯᔪᒪᔪᓂᑦ ᐱᓕᕆᖃᑕᐅᔪᓂᑦ ᐱᓕᕆᕙᓪᓕᐊᓂᖅ 1−ᒥ ᐅᑭᐅᖅᑕᖅᑐᕐᒥ ᓂᕿᓂᑦ ᐋᖅᑭᒋᐊᖅᓯᓂᖅ ᐱᓕᕆᐊᖑᓇᓱᒋᐊᓕᒃ (NFIC). ᑕᒪᒃᑯᓇᖓᑦ ᐱᔪᒥᓇᖅᑐᐊᓗᖕᓂᑦ ᐅᖃᐅᓯᐅᔪᓂᑦ ᐊᒻᒪᓗ ᓯᓚᑐᓂᕆᔭᐅᔪᓂᑦ ᐱᔭᐅᔪᓂᑦ ᓄᑖᕈᕆᐊᖅᓯᔪᒪᔪᓂᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᖏᑦ (CanNor) ᐊᐅᓚᑦᑎᓚᐅᕐᒪᑕ ᐊᒻᒪᓗ ᐅᐸᒃᑕᐅᑎᑦᑎᓪᓗᑎᒃ ᐱᖓᓱᓂᑦ ᐃᒻᒥᒃᑰᖓᔪᓂᑦ ᐊᓯᕈᐃᔪᓂᑦ ᑲᑎᒪᓯᓐᓈᖅᑎᑦᑎᓂᐅᔪᓂᒃ ᐱᒋᐊᕐᓗᑎᒃ ᐊᐃᕆᓕ 11 ᑎᑭᓪᓗᒍ 13, 2022. ᐊᑐᓂ ᑲᑎᒪᓯᓐᓈᕐᓂᐅᑉ ᑲᑎᒪᔾᔪᑎᒃᓴᖏᑦ, ᐋᖅᑭᒃᓱᖅᓯᒪᓂᖏᑦ, ᐊᒻᒪᓗ ᐅᖃᓚᐅᑕᐅᓂᐊᖅᑐᑦ ᐅᖃᖃᑎᒋᒍᑎᒋᔭᐅᓗᑎᒃ ᐋᖅᑭᒃᓱᖅᑕᐅᓚᐅᕐᒪᑕ ᓈᒻᒪᒃᑎᖅᑕᐅᓪᓗᑎᒃ ᐱᓕᕆᖃᑎᒌᓂᖏᓐᓄᑦ, ᐊᑐᕈᓐᓇᖅᓯᖁᔭᐅᓪᓗᑎᒃ ᐅᖃᓚᖃᑎᒌᑐᐃᓐᓇᕈᓐᓇᕐᓗᑎᒃ ᐊᒻᒪᓗ ᑐᓴᖅᑎᖃᑦᑕᐅᑎᓗᑎᒃ ᐱᓕᕆᕕᖁᑎᓂ ᐱᓕᕆᑦᑎᐊᕈᓐᓇᕐᓂᐅᔪᓂᑦ ᑕᒪᒃᑯᓇᓂ ᐊᔾᔨᒌᖏᑦᑑᑎᓂ ᓄᑖᕈᕆᐊᖅᓯᔪᒪᔪᓂ, ᐃᓚᒋᔭᐅᔪᓂ ᐅᑭᐅᖅᑕᖅᑐᕐᒥ ᓂᕿᓂᑦ ᐋᖅᑭᒋᐊᖅᓯᓂᖅ ᐱᓕᕆᐊᖑᓇᓱᒋᐊᓕᒃ (NFIC) ᐅᖃᐅᔨᒋᐊᖅᑎᖏᑕ ᑲᑎᒪᔨᕋᓛᖏᓐᓂᑦ, ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᑕ (CanNor) ᐃᖃᓇᐃᔭᖅᑎᖏᓐᓂᑦ.
ᐱᓕᕆᐊᒃᓴᐅᑉ ᓇᐃᓈᕈᑎᖏᑦ
ᐅᓪᓗᖓ 1 – ᐊᐃᕆᓕ 11
ᓂᕿᒃᓴᖃᑦᑎᐊᕐᓂᖅ, ᐅᒥᖕᒪᕐᔪᐊᓂᑦ ᐱᕈᒃᓰᕕᖁᑎ ᐱᔭᒃᓴᐅᑎᑕᐅᔪᖅ
ᐳᐊᑦ ᓯᒻᓴᓐ ᐊᓪᓚᒪᔪᐃᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑕ
ᑖᓐᓇ ᒪᕐᕉᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᐋᖅᑭᒃᓯᔾᔪᑕᐅᓂᐊᕐᒪᑦ ᐅᒥᖕᒪᕐᔪᐊᓂᑦ ᐱᕈᒃᓰᕈᖕᒥᑦ ᐱᓕᕆᐊᖑᔪᓐᓇᕐᒪᖔᑦ ᖃᐅᔨᔭᐅᓇᓱᐊᕐᓗᓂ, ᐱᖃᓯᐅᑎᓗᒋᑦ ᒪᓕᒃᑕᐅᔭᕆᐊᓕᑦ ᖃᐅᔨᔭᐅᓇᓱᐊᕐᓗᑎᒃ ᐊᒻᒪᓗ ᓄᓇᓕᒃ ᐱᓕᕆᖃᑕᐅᔪᓐᓇᖁᓪᓗᒍ ᓴᕿᑎᑦᑎᒐᔭᕐᓗᑎᒃ ᐱᕈᒃᓰᕕᖕᒥᑦ ᐊᒻᒪᓗ ᓂᕿᓕᕆᕕᒃᑖᕐᓗᑎᒃ.
ᑐᑦᑕᕐᕕᓪᓗᐊᑕᕆᓂᐊᖅᑕᒥᖕᓂᑦ ᐱᖅᑯᓯᕐᒥᒍᑦ ᐊᒻᒪᓗ ᓄᓇᓕᖕᒥ ᓂᕿᓕᕆᕙᒡᓗᑎᒃ ᓂᕿᓕᐅᕐᕕᖕᒥ ᓂᕿᓕᐊᒃᓴᓂᑦ
ᔫᑲᓐ ᐊᓪᓚᐃᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᐅᓚᑦᑎᔨᑦ
ᑖᓐᓇ ᒪᕐᕉᖕᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᓈᓯᒐᔭᕐᒪᑦ ᖃᐅᔨᓇᓱᐊᕐᓂᕐᒥᑦ ᐊᒻᒪᓗ ᐃᓱᒪᓕᐅᕈᑎᖃᕐᓗᓂ ᓴᓇᓯᒪᓂᒃᓴᖓᑕ ᐋᖅᑭᒃᓱᖅᓯᒪᓂᕆᔭᕆᐊᖃᒃᑕᖏᓐᓂᑦ ᐱᓕᕆᔾᔪᓯᐅᓕᖅᑐᓄᑦ ᐱᖅᑯᓯᒃᑯᑦ/ᓄᓇᓕᖕᒥ ᓂᕿᒥᒃ ᑮᓇᐅᔭᓕᐅᕈᑎᖃᕋᓱᐊᕐᓗᓂ ᓂᕆᓕᐅᕐᕕᖕᒥ ᐱᓕᕆᔾᔪᑎᒥᑦ ᐅᐊᐃᑦᕼᐊᓯᒥ ᓂᕿᓕᕆᓂᕐᒥ ᐊᒻᒪᓗ ᑐᖅᑯᐃᓂᕐᒥᑦ ᐆᒪᔪᖅᑕᐅᔪᒥᓂᕐᒥᑦ ᓄᓇᓕᒡᔪᐊᖃᕐᕕᖕᒥ ᓇᔪᖅᑕᐅᔪᒥ. ᐃᓚᒋᔭᐅᒃᑲᓐᓂᕐᓗᓂ ᐱᓕᕆᐊᒃᓴᖅ ᐱᓕᕆᔪᓐᓇᖅᓯᑎᑦᑎᓂᐊᕐᒪᑦ ᐋᖅᑭᒃᓱᖅᑕᐅᓂᖓᓂᑦ ᐱᖅᑯᓯᒃᑯᑦ ᖃᐅᔨᒪᓂᕐᒥᑦ ᐃᓕᓐᓂᐊᕈᑎᒃᓴᓕᐅᕐᓂᖅ ᐱᔭᒃᓴᐅᓕᖅᑎᑦᑎᒐᔭᕐᓗᓂ ᖃᐅᔨᒪᓂᕐᒥᑦ ᐱᖃᖃᑎᒌᓕᕐᓂᕐᒥᑦ ᐊᒻᒪᓗ ᐊᔪᕈᓐᓃᖅᓴᑎᑦᑎᓗᓂ ᐊᓚᐃᑦ ᓂᕿᓕᕆᔾᔪᓯᖏᓐᓂᑦ, ᐊᒻᒪᓗ ᐃᑲᔪᕋᔭᕆᓪᓗᓂ ᐱᓕᕆᐊᕆᔭᕐᓂᖅᓯᑎᑦᑎᓗᓂ ᑮᓇᐅᔭᖃᒃᑎᑦᑎᔾᔪᑎᓂᑦ ᓂᕿᓕᕆᕕᒃᓴᐅᑉ ᓴᓇᔭᐅᓂᒃᓴᖓᓄᑦ.
ᐅᓪᓗᖓ 2 – ᐊᐃᕆᓕ 12
ᕿᑎᒻᒥᐅᑦ ᐃᓄᐃᑦ ᓂᕿᓕᕆᓂᕐᒧᑦ ᐱᓕᕆᔾᔪᑏᑦ ᐊᒻᒪᓗ ᖃᐅᔨᒪᓂᖃᕕᐅᔪᖅ
ᐃᖃᓗᒃᑑᑦᑎᐊᖅ ᕼᐋᒻᒪᓚᖓ
ᑖᓐᓇ ᐱᓕᕆᐊᒃᓴᖅ ᐃᑲᔪᕐᓂᐊᕐᒪᑦ ᕼᒪᓚᒃᑯᖏᓐᓂᑦ ᐃᖃᓗᒃᑑᑦᑎᐊᑉ ᓴᓇᓯᒪᓂᓕᐅᕐᓗᑎᒃ ᐊᒻᒪᓗ ᐋᖅᑭᒃᓯᓗᑎᒃ ᐃᓕᖅᑯᓯᒃᑯᑦ ᐱᔭᐅᓯᒪᔪᒥᑦ, ᑕᒪᐃᑎᒍᑦ, ᐊᒻᒪᓗ ᐱᓕᕆᔾᔪᓯᐅᓕᖅᑐᒥᑦ ᐱᓕᕆᔪᓐᓇᕐᓂᓕᐅᕐᓂᕐᒥᑦ ᐱᓕᕆᒋᐊᕈᑎᒃᓴᓂᑦ ᐊᒻᒪᓗ ᐱᓕᕆᔾᔪᑎᓂᑦ ᐃᑲᔪᕈᑕᐅᓂᐊᖅᑐᓂᑦ 2020-2030 ᕿᑎᕐᒥᐅᑦ ᐋᓐᓂᐊᖃᖏᓐᓂᕐᒧᑦ ᐊᒻᒪᓗ ᓂᕆᔭᒃᓴᖃᑦᑎᐊᕐᓂᕐᒧᑦ ᐱᓕᕆᒋᐊᕈᑎᒃᓴᓄᑦ ᐸᕐᓇᒍᑎᒥᑦ ᐃᓕᓐᓂᐊᖅᑎᑦᑎᓂᒃᑯᑦ ᐊᒻᒪᓗ ᐊᔪᕈᓃᖅᓴᑎᑦᑎᓂᒃᑯᑦ ᐱᓕᕆᔾᔪᑎᓂᑦ ᐊᒃᑐᐊᔪᓂᒃ ᒪᓕᒃᑕᐅᖁᔭᐅᔪᓄᑦ ᐱᕈᒃᑎᑦᑎᓂᕐᒧᑦ ᐱᕈᒃᑐᒥᓂᕐᓂᑦ ᐅᑭᐅᖅᑕᖅᑐᕐᒥ, ᓴᓇᒃᓴᕐᓂᕐᒥᑦ ᐃᓄᕐᓕᑕᓂᒃ ᓂᕿᓂᑦ, ᐊᒻᒪᓗ ᐱᔭᐅᓂᖅᓴᐅᑎᑦᑎᓇᓱᐊᕐᓗᓂ ᓂᕆᓯᒪᑦᑎᐊᕐᓇᖅᑐᓂᑦ ᐋᓐᓂᐊᖃᓇᖏᑦᑐᓂᑦ ᐊᒻᒪᓗ ᐱᓕᕆᑦᑎᐊᕈᓐᓇᕐᓂᕆᔭᐅᔪᓂᑦ ᐱᔭᐅᑎᑦᑎᕙᒡᓗᑎᒃ ᑭᑎᕐᒥᐅᑦ ᐊᕕᒃᑐᖅᓯᒪᓂᖓᓂ.
ᓴᙱᓂᖅᓴᐅᓕᖅᑎᑦᑎᓂᖅ ᓂᕿᒃᓴᖅᓯᐅᓂᕐᒧᑦ ᐊᖑᓇᓱᐊᕈᓐᓇᕐᓂᕐᒥᑦ
ᐃᓕᓴᖅᓯᕕᒃ ᑲᑐᔾᔨᖃᑎᒋᑦ
ᑲᔪᓯᑎᑕᐅᓂᑯᖓ ᐊᐅᓚᑕᐅᓗᓂ ᐃᓕᓐᓂᐊᖅᓯᓐᓈᕐᓂᕐᒧᑦ ᐃᓕᓴᔾᔪᑎ, ᑖᓐᓇ ᐱᓕᕆᐊᒃᓴᖅ ᐃᖃᓇᐃᔭᖅᑎᑦᑎᓂᐊᕐᒪᑦ ᐊᖑᓇᓱᐊᖅᑎᒥᑦ ᐃᓕᓴᐃᔨᐅᓗᓂ ᐃᓕᓐᓂᐊᖅᑎᑦᑎᓂᐊᕐᓗᓂ ᐱᖅᑯᓯᒃᑯᑦ ᐃᓄᕐᓕᑕᓂᒃ ᓂᕿᓂᑦ ᐊᕐᕌᒍᓕᒫᒥ ᐃᓐᓇᒪᕆᓐᓅᑕᐅᖃᑦᑕᕋᔭᖅᑐᓂᒃ, ᓱᕈᓯᕐᓄᑦ, ᐃᓚᒌᓄᑦ, ᐊᒻᒪᓗ ᐊᓯᖏᓐᓄᑦ ᓄᓇᓕᖕᒥᐅᑕᖃᑕᐅᔪᓄᑦ, ᐊᒻᒪᓗ ᐱᓕᕆᔪᓐᓇᖅᓯᑎᑦᑎᓗᓂ ᐊᔪᕈᓐᓃᖅᓴᑎᑕᐅᓗᑎᒃ ᒪᒃᑯᒃᑐᑦ ᐊᖑᓇᓱᒍᓐᓇᖅᓯᑎᑕᐅᓗᑎᒃ ᐊᒻᒪᓗ ᓂᕿᒃᓴᖅᓯᕙᒡᓗᑎᒃ ᐃᓄᕐᓕᑕᓂᑦ ᓂᕿᓂᑦ, ᐃᑲᔪᕈᑎᒋᔭᐅᓗᑎᒃ ᐃᓄᖕᓅᖓᓗᑎᒃ ᓂᖀᑦ ᒪᑭᒪᔾᔪᑕᐅᔪᓐᓇᖅᑐᑦ.
ᐃᓄᕐᓕᑕᐃᑦ ᓂᖀᑦ ᓄᓇᓕᖕᓂ ᐱᓕᕆᔾᔪᑎᓕᐊᖑᔪᓂ
ᓯᓚᑦᑐᖅᓴᕐᕕᒡᔪᐊᖓ ᐅᐋᑐᓘᑉ
ᑖᓐᓇ ᒪᕐᕉᖕᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᐱᓕᕆᐊᖑᑎᑦᑎᓂᐊᕐᒪᑦ ᖃᐅᔨᓇᓱᐊᕐᓂᕐᒥᑦ ᐊᒻᒪᓗ ᐋᖅᑭᒃᓱᖅᑕᐅᑎᑦᑎᓗᓂ ᐱᖅᑯᓯᒃᑯᑦ ᓂᕿᓕᕆᓂᕐᒧᑦ ᒪᓕᒃᑕᐅᔭᕆᐊᓕᖕᓂᑦ ᐃᓕᖅᑯᓯᒃᑯᑦ ᓈᒻᒪᒃᑐᓂᑦ ᐱᔭᐅᑎᑦᑎᔪᖃᖁᓪᓗᒍ ᐃᓄᕐᓕᑕᓂᑦ ᓂᕿᓂᑦ ᐊᑐᖅᑕᐅᔪᒧᑦ ᓂᕿᓕᕆᔾᔪᓯᐅᕙᒃᑐᒧᑦ ᐱᓕᕆᔾᔪᑎᒧᑦ ᑐᒃᑐᔭᖅᑐᕐᒥ ᐊᒻᒪᓗ ᐊᐅᓚᑐᕐᒥ. ᐱᓕᕆᐊᒃᓴᖅ ᓂᕆᐅᒋᔭᐅᕗᖅ ᓴᕿᔾᔪᑕᐅᒐᔭᕆᐊᖓᓂᑦ ᐊᒃᓲᓂᖅᓴᖅ ᐃᓄᕐᓕᑕᓂᑦ ᓂᕿᓂᑦ ᑐᖅᑯᐃᖃᑦᑕᕈᓐᓇᖅᓯᒐᔭᕐᓗᑎᒃ ᐊᒻᒪᓗ ᐱᖃᑦᑕᕈᓐᓇᖅᓯᓗᑎᒃ, ᐊᔪᖏᓂᖅᓴᐅᓕᖅᑎᑕᐅᓗᓂ ᓄᓇᓕᐅᑉ ᓂᕿᒃᓴᖃᕈᓐᓇᕐᓂᖅᓴᐅᓕᕐᓗᑎᒃ ᐊᖑᓇᓱᐊᖅᑕᐅᓂᖏᓐᓄᑦ ᐊᒻᒪᓗ ᑐᓂᐅᖃᒃᑕᐅᖃᑦᑕᕐᓂᖏᓐᓄᑦ, ᐊᒻᒪᓗ ᐊᖑᓇᓱᐊᖅᑎᓂᑦ ᐱᓕᕆᖃᑎᒌᒃᑐᓂᑦ ᐋᖅᑭᒃᓱᖅᑕᐅᔪᖃᕐᓗᓂ.
ᐅᓪᓗᖓ 3 – ᐊᐃᕆᓕ 13
ᑲᖑᖅ ᓂᕐᓕᒃ ᓂᕕᐊᒃᓴᓕᐊᖑᓂᖏᓐᓂᑦ ᐱᕙᓪᓕᐊᑎᑦᑎᓂᖅ: ᐃᓄᐃᑦ ᓂᕿᖏᓐᓂ ᐊᐅᓚᑦᑎᕕᖃᕐᓂᖅ
ᐊᖅᑭᐅᒪᕝᕕᒃ ᑲᑐᔾᔨᖃᑎᒋᑦ
ᑖᓐᓇ ᒪᕐᕉᖕᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᓂᕆᐅᒋᔭᐅᕗᖅ ᐱᓕᕆᔾᔪᑎᒥᒍᑦ ᐊᒻᒪᓗ ᓇᓚᐅᑦᑎᐊᕐᓗᓂᒋᑦ ᖃᐅᔨᓴᕐᓂᐊᕐᓗᒋᑦ ᐋᓐᓂᐊᖃᖏᓐᓂᖏᑦ ᑕᒫᓂ ᑲᖑᐃᑦ ᐊᒥᓲᓂᖏᑦ, ᓴᓇᓗᓂ ᐊᒻᒪᓗ ᖃᐅᔨᓴᖅᑕᐅᓗᑎᒃ ᓄᑖᑦ ᑲᖑᐃᑦ ᓂᐅᕕᐊᒃᓴᐃᑦ ᐃᑲᔪᖅᑕᐅᖁᓪᓗᒋᑦ ᑮᓇᐅᔭᓕᐅᕈᑕᐅᔪᓐᓇᕋᔭᕐᓂᖅᐸᑕ ᐱᓕᕆᐊᖑᓗᑎᒃ ᓄᓇᓕᖕᒥ, ᐊᒻᒪᓗ ᐃᓕᑎᑕᐅᓗᑎᒃ ᐃᓅᖃᑎᒋᕕᖏᑦ ᐋᓐᓂᐊᖃᖏᓐᓂᕐᒧᑦ ᐱᕚᓕᕈᑕᐅᔪᑦ ᑲᖑᕐᓂᑦ ᓂᕆᖃᑦᑕᕐᓂᖏᓐᓄᑦ, ᐃᓚᒋᔭᐅᓗᑎᒃ ᐱᓕᕆᔪᓐᓇᕐᓂᓕᐅᕐᓂᕐᒧᑦ ᐊᒻᒪᓗ ᐱᕙᒡᓗᑎᒃ ᐱᕙᓪᓕᐊᑎᑕᐅᓂᖏᓐᓂᑦ ᐊᒻᒪᓗ ᑐᓂᐅᖃᒃᑕᐅᖃᑦᑕᕐᓂᖏᓐᓂᑦ.
ᐃᓄᒃᓯᐅᑐᖅᑕ ᐃᓄᕐᓕᑕᐃᑦ ᓂᕿᓂᑦ ᐱᓕᕆᔪᑎ
ᖃᔪᖅᑐᕐᕕᒃ ᓄᓇᓕᖕᒥ ᓂᕆᔭᖅᑐᕐᕕᒃ
ᑖᓐᓇ ᒪᕐᕉᖕᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᐱᓕᕆᐊᖃᕋᓱᐊᕐᒪᑦ ᐱᕙᓪᓕᐊᑎᑦᑎᔪᒪᓪᓗᓂ ᐃᓄᕐᓕᑕᓂᑦ ᓂᕿᓕᕆᕕᖃᕐᓗᓂ, ᑐᖅᑯᐃᕕᖃᕐᓗᓂ, ᐊᒻᒪᓗ ᐱᓇᓱᐊᕈᓯᖅᑕᒫᑦ ᑐᓂᐅᕋᐃᕙᒡᓗᑎᒃ ᐱᓕᕆᔾᔪᑎ ᐃᖃᓗᖕᓂ, ᓄᓇᕗᑦ, ᐊᑐᕐᓗᑎᒃ ᐊᑐᖅᑕᐅᔪᓐᓇᕋᔭᖅᑐᒥᑦ ᐊᑭᓕᐅᖅᓯᕙᒡᓗᑎᒃ ᐃᒡᓗᒥᐅᖃᑎᒋᑦ ᐊᑭᓖᕙᒡᓗᑎᒃ ᐊᑭᓕᐅᕈᓐᓇᖅᑕᒥᖕᓂᑦ ᐱᖃᑕᐅᓂᐊᕐᓗᑎᒃ ᐆᒪᔪᖅᑕᐅᔪᒥᓂᕐᓂᑦ. ᐱᐅᓂᖅᓴᐅᓕᖅᑎᑦᑎᒐᔭᕐᒪᑦ ᐱᕕᒃᓴᖃᓕᖅᑎᑦᑎᓗᓂ ᐊᖑᓇᓱᐊᖅᑎᑦ ᑮᓇᐅᔭᓕᐅᕈᑎᖃᕈᓐᓇᖅᓯᓗᑎᒃ ᐊᖑᓇᓱᐊᖅᐸᒃᑕᒥᓂᒃ ᐃᓄᕐᓕᑕᓂᑦ ᓂᕿᓂᒃ, ᑐᖅᑯᐃᕕᒃᓴᖃᕐᓗᑎᒃ ᐊᒻᒪᓗ ᓂᕿᓕᕆᕕᒃᓴᖃᕐᓗᑎᒃ, ᐊᑐᕐᓗᑎᒃ ᐱᕙᓪᓕᐊᑎᑦᑎᓂᕐᒥᒃ ᐊᒻᒪᓗ ᐊᖏᓂᖅᓴᐅᓕᖅᑎᑕᐅᓗᓂ ᐋᓐᓂᐊᖃᖏᓐᓂᕐᒧᑦ ᐊᒻᒪᓗ ᑲᔪᓯᔪᓐᓇᓗᑎᒃ ᓂᐅᕕᐊᒃᓴᐃᑦ, ᐊᒻᒪᓗ ᐃᑲᔪᕐᓂᖃᕋᔭᕐᒪᑦ ᓴᙱᓂᖅᓴᐅᓕᖅᑎᑦᑎᔾᔪᑕᐅᓗᓂ ᓂᕿᒃᓴᖃᑦᑎᐊᕋᓱᐊᕐᓂᕐᒧᑦ ᐅᑭᐅᖅᑕᖅᑐᕐᒥ.
ᕿᑭᖅᑕᓂ ᓂᕿᓂᒃ ᐊᐅᓚᑦᑎᕕᖃᕈᓐᓇᕐᓂᖅ ᐊᑐᓕᖅᑎᑕᐅᓂᖓᓄᑦ ᐋᖅᑭᒃᓯᔾᔪᑎ
ᕿᑭᖅᑖᓗᒃ ᑯᐊᐳᕆᓴᓐ ᓇᖕᒥᓂᖁᑎᖏᓪᓗ
ᑖᓐᓇ ᒪᕐᕉᖕᓄᒃ−ᐊᕐᕌᒍᖕᓄᒃ ᐱᓕᕆᐊᒃᓴᖅ ᓂᕆᐅᒋᔭᐅᖕᒪᑦ ᐋᖅᑭᒃᓯᒐᔭᖅᑐᕆᔭᐅᓪᓗᓂ ᓄᓇᓕᖕᓅᖓᔪᒥᑦ ᐋᖅᑭᒃᓱᖅᓯᒪᓂᕐᒥᑦ, ᓲᕐᓗ ᒪᑯᓂᖓ ᐊᒡᒍᐃᓗᓂ ᐃᒻᒧᓯᕐᓗᒋᓪᓗ ᓂᖀᑦ ᓂᕿᓕᕆᐊᖑᔪᑦ ᐱᓕᕆᕕᖓᓂ, ᐋᖅᑭᒃᓱᐃᔾᔪᑎᒋᔭᐅᓗᓂ ᐱᓕᕆᐊᖑᔪᓐᓇᕐᓂᖓᓂᑦ ᐊᖑᓇᓱᐊᖅᑕᐅᕙᒃᑐᓄᑦ ᐊᒻᒪᓗ ᑐᓂᐅᖃᒃᑕᐅᕙᒃᑐᓄᑦ, ᐊᒻᒪᓗ ᑕᕝᕗᖓᑦᑕᐅᑎᒋ ᐃᑲᔪᖅᑕᐅᓗᑎᒃ ᓄᓇᓕᖕᒥ ᐊᖑᓇᓱᐊᖅᑎᐅᔪᑦ. ᐱᓕᕆᐊᒃᓴᖅ ᐃᑲᔪᕋᔭᕐᒪᑦ ᓂᕿᒃᓴᖃᑦᑎᐊᖃᑦᑕᕐᓂᕐᒧᑦ ᐃᓱᒪᓕᐅᕈᑕᐅᓂᖓᓄᑦ ᐊᒻᒪᓗ ᐊᑐᕈᒫᕐᓂᐊᑐᓕᐊᖑᓂᖏᓐᓄᑦ ᓇᒻᒪᓈᕐᓂᖏᑎᒍ ᓄᓇᓕᐅᑉ ᐋᖅᑭᒃᓱᖅᓯᒪᓂᖏᑎᒍ ᓈᒪᒍᓐᓇᕐᓗᑎᒃ ᐱᔭᐅᔭᕆᐊᓕᖕᓄᑦ ᐊᔾᔨᐅᖏᑦᑐᓄᑦ ᓄᓇᓕᖕᓄᑦ ᐃᓘᓐᓇᓕᒫᖓᓂ ᕿᑭᖅᑕᓂ ᐊᕕᒃᑐᖅᓯᒪᓂᕐᒥ.
ᐱᓕᕆᔾᔪᓯᐅᓕᖅᑐᖅ ᐃᓅᖃᑎᒋᑦ ᐱᓕᕆᔪᒪᑦᑎᐊᕐᓂᖏᓐᓄᑦ ᓇᖕᒥᓂᖁᑎᑦ ᑕᑯᑭᓴᐅᑎᑦᑎᔾᔪᑎᖓ ᓄᓇᓕᖕᒥ ᓂᕿᖏᓐᓂᑦ ᐅᑭᐅᖅᑕᖅᑐᕐᒥ
ᐃᖃᓗᒃᐱᕋᓛᖅ/ᑲᐅᕐᒫᒃᔅ ᐊᓪᓚᐃᑦ
ᑖᓐᓇ ᐱᓕᕆᐊᒃᓴᖅ ᖃᐅᔨᓇᓱᐊᕈᑕᐅᓂᖃᕐᒪᑦ ᐊᒻᒪᓗ ᓴᓇᔾᔪᑕᐅᓗᓂ ᖃᑦᓯᑲᓚᒪᕆᖕᓂᑦ ᐃᓅᖃᑎᒋᓄᑦ ᓇᖕᒥᓂᖁᑎᒋᔭᐅᔪᓄᑦ ᐃᓱᒪᒃᓴᖅᓯᐅᕈᑕᐅᔪᖅ ᐸᕐᓇᒍᑎ ᓄᓇᓕᐅᑉ ᐱᕈᒃᓰᕕᒃ ᐃᒡᓗᖁᑎᖓ, ᓴᓇᔭᐅᓯᒪᔪᖅ ᓯᕗᓪᓕᐅᑎᔭᐅᖁᓪᓗᒋᑦ ᓂᕿᖃᒃᑎᑦᑎᓂᖅ ᐊᑭᑐᓗᐊᖏᓪᓗᑎᒃ ᐅᕝᕙᓘᓐᓃᑦ ᐊᑭᖃᖏᓪᓗᑎᒃ ᓄᓇᓕᖕᒥᐅᑕᕐᓄᑦ ᐊᒻᒪᓗ ᐱᓕᕆᔾᔪᑕᐅᓂᖏᓐᓄᑦ ᖃᐅᔨᓇᓱᐊᕈᑕᐅᓗᓂ ᖃᐅᔨᔭᕆᐅᕋᓱᐊᕐᓗᒋᑦ ᐊᔾᔨᒌᖏᑦᑐᓃᖓᖅᓯᒪᔪᑦ ᖃᐅᔨᒪᔾᔪᑎᒃᓴᐃᑦ ᑕᐃᒫᑦᑕᐃᓇᓕᖁᓪᓗᒋᑦ ᑮᓇᐅᔭᖃᒃᑎᑦᑎᔾᔪᑕᐅᕙᒃᑐᑦ ᓄᓇᓕᖕᒧᑦ ᐱᕈᒃᓰᕕᒃ ᐃᔨᓗᖁᑎᖓ.
ᓇᐃᓈᖅᓯᔾᔪᑎᑦ ᐊᒻᒪᓗ ᐅᖃᐅᑕᐅᓗᐊᙳᐊᕐᓂᖏᑦ
ᐅᓪᓗᖓ 1, ᐊᐃᕆᓕ 11
ᓯᕗᓪᓕᖅ ᑲᑎᒪᓯᓐᓈᕐᓂᖅ ᑐᕌᖓᓚᐅᕐᒪᑦ ᓄᑖᕈᕆᐊᖅᓯᔪᒪᔪᓄᑦ ᐅᖃᓚᐅᖅᑐᓄᑦ ᐱᔪᒪᓂᕋᒃᖢᑎᒃ ᐱᓕᕆᖃᑕᐅᔪᒪᒐᔭᕐᓂᕐᒥᖕᓂᑦ ᐊᒥᓲᖏᓪᓗᑎᒃ ᐃᖃᓇᐃᔭᖃᑎᒋᒃᑐᓂ ᐅᖃᐅᔨᒋᐊᖅᑎᓂᑦ ᑲᑎᒪᔨᕋᓛᖑᖃᑕᐅᔪᓂᑦ, ᐅᖃᖃᑎᒌᒍᑎᖃᕐᓗᑎᒃ ᐅᖃᓪᓚᐅᑎᖃᕐᓗᑎᒃ ᐱᖃᓯᐅᑎᓗᒋᑦ ᓇᓗᓇᐃᖅᓗᑎᒃ ᐱᓕᕆᐊᓴᒧᑦ ᖁᒃᓴᓇᕈᑎᔪᓂᒃ ᐊᒻᒪᓗ ᐋᖅᑭᒃᓯᓗᑎᒃ ᖁᒃᓴᓇᕈᑎᔪᓄᑦ ᐊᒃᓱᐊᓘᕈᓐᓃᖅᑎᑦᑎᔾᔪᑎᓂᒃ ᐱᓕᕆᒋᐊᕈᑎᒃᓴᓂᒃ. ᓄᑖᕈᕆᐊᖅᓯᔪᒪᔪᓂ ᐱᓕᕆᖃᑕᐅᔪᑦ ᐃᓚᖃᓚᐅᖅᐳᑦ ᐳᐊᑦ ᓯᒻᓴᓐ ᐊᓪᓚᒪᔪᐃᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑖᓂᑦ, ᐅᖃᖃᑎᒋᒍᑎᖃᕐᓗᑎᒃ ᐱᓕᕆᐊᒃᓴᒥᓂᒃ "ᓂᕿᒃᓱᖃᑦᑎᐊᕐᓂᕐᒥᑦ, ᐅᒥᖕᒪᕐᔪᐊᓂᑦ ᐱᕈᒃᑎᑦᑎᕙᒡᓗᑎᒃ ᓂᕿᒃᓴᕆᓂᐊᖅᑕᒥᖕᓂᑦ", ᐊᒻᒪᓗ ᔫᑲᓐ ᐊᔾᓚᖏᑕ ᐃᓕᓐᓂᐊᖅᑐᓕᕆᓂᕐᒧᑦ ᐊᐅᓚᑦᑎᔨᑦ ᑲᑐᔾᔨᖃᑎᒌᖏᑦ ᐅᖃᖃᑎᒋᒍᑎᖃᕐᓗᑎᒃ "ᑐᑦᑕᕐᕕᓪᓗᐊᑕᕆᓂᐊᖅᑕᒥᖕᓂᑦ ᐱᖅᑯᓯᕐᒥᒍᑦ ᐊᒻᒪᓗ ᓄᓇᓕᖕᒥ ᓂᕿᓕᕆᕙᒡᓗᑎᒃ ᓂᕿᓕᐅᕐᕕᖕᒥ ᓂᕿᓕᐊᒃᓴᓂᑦ" ᐱᓕᕆᐊᒃᓴᒥ. ᐃᓘᓐᓇᖏᓐᓂ ᐱᖓᓱᓂ ᑲᑎᑕᐅᓯᒪᔪᓂ ᐋᖅᑭᒃᓯᓇᓱᐊᕐᓗᑎᒃ ᐅᖃᖃᑎᒋᖕᓂᑦ, ᓄᑖᕈᕆᐊᖅᓯᔪᒪᔪᑦ ᐊᒻᒪᓗ ᐅᖃᐅᔾᔨᒋᐊᖅᑎᓂᑦ ᑲᑎᒪᔨᕋᓛᖑᖃᑕᐅᔪᑦ ᐊᔾᔨᒌᖏᑦᑑᑎᓂᑦ ᐃᓕᓐᓂᐊᓂᓕᕆᓂᕐᒥ ᐃᓕᓐᓂᐊᕐᕕᖕᓂᑦ, ᐃᖃᓇᐃᔭᕐᕕᖕᓂᑦ, ᐊᒻᒪᓗ ᐊᔪᖏᓕᕇᓂᑦ ᒐᕙᒪᒃᑯᓐᓂ ᐅᖃᖃᑎᒋᒍᑎᖃᓚᐅᕐᒪᑕ ᐱᓕᕆᐊᒃᓴᒧᑦ ᖁᒃᓴᓇᓂᖃᕕᐅᓲᓂᑦ ᐃᓱᒫᓗᒋᔭᐅᔪᓂᑦ ᐊᒻᒪᓗ ᐱᓕᕆᒋᐊᕐᕕᒃᓴᐅᔪᓂᑦ, ᓲᕐᓗ ᐊᒃᑐᐃᓂᕆᔭᐅᓲᓂᑦ ᐃᓱᒪᒋᔭᐅᓯᒪᖏᑦᑐᓄᑦ ᖃᓄᐃᓕᔾᔪᑕᐅᓪᓗᑎᒃ (ᑐᑭᓕᐅᑎᓗᒍ, ᓄᕙᒡᔪᐊᕐᓇᖅ-19) ᐱᓕᕆᐊᒃᓴᖁᑎᓄᑦ ᖁᒃᓴᓇᕈᑎᔪᓄᑦ ᐸᕐᓇᒍᑎᓂᒃ ᐊᒻᒪᓗ ᐱᔭᕇᒃᓯᒪᕕᐅᔭᕆᐊᓕᖕᓂᑦ, ᐱᔭᐅᔾᔭᐃᕈᑎᓕᐅᕐᓗᓂ ᒪᑯᓄᖓ ᐊᑯᓂ−ᑕᐅᕗᖓᑐᖃᒃ ᖁᒃᓴᓇᕈᑎᔪᓄᑦ ᐃᓚᒋᐊᒃᑲᓂᕈᑎᑎᒍ ᐸᕐᓇᒍᑎᓂᑦ, ᐊᒻᒪᓗ ᐱᒻᒪᕆᐅᓂᖏᓐᓂᑦ ᐱᖏᒡᓇᐃᖅᓯᓂᕐᒥᑦ ᐃᖃᓇᐃᔭᕐᕕᒋᔭᒥ ᐊᔪᐃᓐᓇᕈᔾᔨᔨᓂᑦ ᑕᐃᒃᑯᓇᖓᑦ ᐱᓕᕆᖃᑎᒋᔭᓂᑦ ᑲᑎᑕᐅᓯᒪᔪᓂᑦ, ᐱᓗᐊᙳᐊᖅᑐᒥᑦ ᒪᑯᓇᓂ ᖃᓪᓕᖃᑦᑕᐅᓯᒪᔪᓂ ᐊᐅᓚᑦᑎᓂᕐᒧᑦ ᐋᖅᑭᒃᓱᖅᓯᒪᓂᐅᔪᓂ.
ᐅᓪᓗᖓ 2, ᐊᐃᕆᓕ 12
ᑕᐃᔅᓱᒪᓂ ᐊᐃᑉᐹᓂ ᑲᑎᒪᓯᓐᓈᕐᓂᕐᒥ, ᓄᑖᕈᕆᐊᖅᓯᔪᒪᔪᑦ ᐃᓕᓴᖅᓯᕕᒃ ᑲᑐᔾᔨᖃᑎᒌᓂᖓᖅᑐᑦ (ᐱᓕᕆᐊᒃᓴᖅ: ᓴᙱᓂᖅᓴᐅᓕᖅᑎᑦᑎᓂᖅ ᓂᕿᒃᓴᖅᓯᐅᓂᕐᒧᑦ ᐊᖑᓇᓱᐊᕈᓐᓇᕐᓂᕐᒥᑦ ᑲᖏᖅᑐᒑᐱᖕᒥ), ᕼᒪᓚᖓᓂ ᐃᖃᓗᒃᑑᑦᑎᐊᑉ (ᐱᓕᕆᐊᒃᓴᖅ: ᕿᑎᒻᒥᐅᑦ ᐃᓄᐃᑦ ᓂᕿᓕᕆᓂᕐᒧᑦ ᐱᓕᕆᔾᔪᑏᑦ ᐊᒻᒪᓗ ᖃᐅᔨᒪᓂᖃᕕᐅᔪᖅ), ᐊᒻᒪᓗ ᓯᓚᑦᑐᖅᓴᕐᕕᒡᔪᐊᖓᓂ ᐅᐋᑐᓘᑉ (ᐱᓕᕆᐊᒃᓴᖅ: ᐃᓄᕐᓕᑕᐃᑦ ᓂᖀᑦ ᓄᓇᓕᖕᓂ ᐱᓕᕆᔾᔪᑎᓕᐊᖑᔪᓂ ᑐᒃᑐᔭᖅᑐᕐᒥ ᐊᒻᒪᓗ ᐊᐅᓚᑐᕐᒥ) ᐱᔭᐅᑎᑦᑎᓚᐅᕐᒪᑕ 15−ᒪᓇᑦᓯᓂᒃ ᐅᖃᓚᐅᑎᖃᒃᓯᓐᓈᕐᓗᑎᒃ ᑐᓴᕋᓈᕆᐊᖅᑐᖅᓯᒪᔪᓄᑦ ᐃᒻᒥᖕᓄᑦ, ᐅᖃᐅᔾᔨᒋᐊᖅᑎᐅᓂᕐᒧᑦ ᑲᑎᒪᔨᕋᓛᖑᖃᑕᐅᔪᓂᑦ ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᓂᑦ (CanNor) ᑭᒡᒐᖅᑐᐃᔪᓂᑦ. ᑭᖑᓂᖓᒍᑦ ᐊᑐᓂ ᐅᖃᓚᐅᑎᖃᒃᓯᓐᓈᕈᑕᐅᔪᑦ, ᐅᖃᓚᐅᑎᖃᒃᓯᓐᓈᖅᑐᖅ ᐱᕕᖃᒃᑎᑕᐅᓚᐅᕐᒥᔪᖅ ᑭᐅᖃᑦᑕᕈᓐᓇᕐᓗᓂ ᐊᒻᒪᓗ ᐊᐱᕆᖃᑦᑕᕈᓐᓇᕐᓗᓂ ᐊᔾᔨᒌᖏᑦᑑᑎᓂ ᐱᓕᕆᔪᓐᓇᑦᑎᐊᖅᑐᓂᑦ ᑲᑎᒪᓯᓐᓈᖃᑕᐅᔪᓂᑦ ᑲᑎᒪᓯᓐᓈᕐᓂᕐᒥᑦ. ᐅᖃᐅᑎᒋᔭᐅᓗᐊᙳᐊᕐᓗᑎᒃ ᐅᖃᖃᑎᒋᓂᕐᒥ ᐃᓚᖃᓚᐅᖅᐳᑦ ᐃᓱᒪᒃᓴᖅᓯᐅᕈᑕᐅᖁᓪᓗᒋᑦ "ᓈᒻᒪᒃᑎᕋᓱᐊᕐᓗᒋᑦ" ᐱᓕᕆᐊᒃᓴᐃᑦ (ᑕᒪᕐᒥᒃ ᓄᓇᓕᖕᓂᑦᑐᑦ ᐊᒻᒪᓗ ᐊᓯᓕᒫᖏᓐᓃᑦᑐᑦ), ᓅᑎᑦᑎᖔᕐᓗᓂ ᖃᐅᔨᒪᔪᑎᒃᓴᓂᑦ ᐅᕝᕙᓘᓐᓃᑦ ᐱᓕᕆᑦᑎᐊᕈᓐᓇᕐᓂᐅᔪᓂᑦ ᐊᓯᖏᓐᓄᑦ ᐊᕕᒃᑐᖅᓯᒪᓂᕐᓄᑦ ᐱᖃᖃᑕᐅᔪᓄᑦ ᐱᓕᕆᐊᖑᓇᓱᒋᐊᓕᖕᓂᑦ ᐅᕝᕙᓘᓐᓃᑦ ᐱᓕᕆᒋᐊᕐᕕᒃᓴᐅᔪᓂᑦ, ᐊᒻᒪᓗ ᐊᐅᓚᑦᑎᓗᓂ ᐃᓘᓐᓇᓕᒫᖏᓐᓂ ᓄᓇᓕᖕᒥ ᐱᖃᒃᑎᐅᖃᑕᐅᔪᓂᑦ ᑲᑎᑕᐅᓯᒪᔪᓂᑦ ᐊᔾᔨᒌᖏᑦᑐᓂᑦ ᐊᔪᖏᓐᓂᓕᖕᓂᑦ ᐱᓕᕆᔪᓐᓇᕐᓂᓕᖕᓂᑦ ᓈᒻᒪᒃᑐᓂᑦ ᐱᓕᕆᖃᑕᐅᔪᓐᓇᕐᓂᖃᒃᑐᓂᑦ, ᐱᓕᕆᖃᑕᐅᔪᓐᓇᖅᑐᓂᑦ, ᐊᒻᒪᓗ ᖃᐅᔨᒪᓂᕐᒥᑦ−ᐱᔭᐅᑎᑦᑎᔪᓐᓇᕐᓗᑎᒃ ᐃᓘᓐᓇᓕᒫᖓᓂ ᐱᓕᕆᐊᒃᓴᐅᑉ ᖃᓄᐃᓘᕈᑎᒋᔭᖏᓐᓂ. ᓄᑖᕈᕆᐊᖅᓯᔪᒪᔪᑦ ᐱᔭᐅᑎᑦᑎᓚᐅᕐᒪᑕ ᑐᓴᐅᒪᔾᔪᑎᒃᓴᓂᑦ ᐃᓚᖏᓐᓂ ᐱᓕᕆᖃᑎᒌᖕᓂᐅᔪᓐᓇᕋᔭᖅᑐᓂ ᐱᓕᕆᐊᖑᕙᓪᓕᐊᓕᓚᐅᖅᑐᓂ, ᐊᒻᒪᓗ ᑲᓱᖅᑎᑕᐅᓯᒪᓕᖅᕇᒃᖢᑎᒃ ᐃᒻᒥᖕᓄᑦ ᑕᒪᒃᑯᓇᓂ ᓯᕗᓂᒃᓴᒥ ᐱᓕᕆᖃᑎᒌᒃᑲᔭᖅᑐᓂ ᐊᒻᒪᓗ ᑎᒥᖑᖅᑎᑕᐅᓯᒪᔪᓂ.
ᐅᓪᓗᖓ 3, ᐊᐃᕆᓕ 12
ᐱᖓᔪᒋᔭᐅᔪᖅ ᑲᑎᒪᓯᓐᓈᕐᓂᖅ ᑲᑎᖃᑎᒌᒃᑎᑦᑎᓚᐅᕐᒪᑦ ᓄᑖᕈᕆᐊᖅᓯᔪᒪᔪᓂᑦ ᓇᓪᓕᐊᖕᓂᑐᐃᓐᓇᖅ ᐃᓱᐊᓂᑦ ᑲᓇᑕᐅᑉ ᓄᓇᓕᖃᕕᒋᑕ. ᓄᓇᕗᕐᒦᖓᖅᑐᑦ, ᐊᖅᑭᐅᒪᕝᕕᒃ ᑲᑐᔾᔨᖃᑎᒋᑦ ᐅᖃᓚᐅᑎᖃᓚᐅᕐᒪᑕ ᐱᓕᕆᐊᒃᓴᖁᑎᒥᖕᓂᑦ "ᑲᖑᖅ ᓂᐅᕕᒃᓴᑦ ᐱᕙᓪᓕᐊᑎᑕᐅᓂᖏᓐᓂᑦ – ᐃᓄᐃᑦ ᓂᕿᖏᓐᓂ ᐊᐅᓚᑦᑎᕕᖃᕐᓂᖅ," ᖃᔪᖅᑐᕐᕕᒃ ᓄᓇᓕᖕᒥ ᓂᕿᖃᒃᑎᑦᑎᕕᒃ ᐅᖃᓪᓚᐅᔾᔨᓚᐅᕐᒪᑕ "ᐃᓄᕐᓕᑕᓕᕆᓂᕐᒥ ᐱᓕᕆᐊᒃᓴᑦ ᐃᖃᓗᖕᓂ" ᐱᓕᕆᐊᒃᓴᖅ, ᐊᒻᒪ.ᓗ ᕿᑭᖅᑖᓗᒃ ᑯᐊᐳᕆᓴᓐ ᓇᖕᒥᓂᖁᑎᖏᓪᓗ ᐅᖃᓚᐅᑎᖃᓚᐅᕐᒪᑕ ᐱᓕᕆᐊᒃᓴᖁᑎᒥᖕᓂᑦ, "ᕿᑭᖅᑕᓂ ᓂᕿᓂᒃ ᐊᐅᓚᑦᑎᕕᖃᕈᓐᓇᕐᓂᖅ ᐊᑐᓕᖅᑎᑕᐅᓂᖓᓄᑦ ᐋᖅᑭᒃᓯᔾᔪᑎ." ᔫᑲᓐᒥᑦ, ᐃᖃᓗᒃᐱᕋᓛᖅ/ᑲᐅᕐᒫᒃᔅ ᐊᓪᓚᐃᑦ ᐅᖃᖃᑎᒋᒍᑎᖃᓚᐅᕐᒪᑕ ᐱᓕᕆᐊᒃᓴᖁᑎᒥᖕᓂᑦ "ᐱᓕᕆᔾᔪᓯᐅᓕᖅᑐᖅ ᐃᓅᖃᑎᒋᑦ ᐱᓕᕆᔪᒪᑦᑎᐊᕐᓂᖏᓐᓄᑦ ᓇᖕᒥᓂᖁᑎᑦ ᑕᑯᑭᓴᐅᑎᑦᑎᔾᔪᑎᖓ ᓄᓇᓕᖕᒥ ᓂᕿᖏᓐᓂᑦ ᐅᑭᐅᖅᑕᖅᑐᕐᒥ." ᑕᐃᒫᖑᓚᐅᕐᒪᑦ ᐱᓕᕿᐊᖑᔪᒥ ᐅᓪᓗᖓ 1−ᒥ, ᓄᑖᕈᕆᐊᖅᓯᔪᒪᔪᑦ, ᐅᖃᐅᔾᔨᒋᐊᖅᑎᓂᑦ ᑲᑎᒪᔨᕋᓛᖑᖃᑕᐅᔪᑦ, ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᖏᑕ (CanNor) ᐃᖃᓴᐃᔭᖅᑎᖏᑦ ᐱᓕᕆᖃᑕᐅᓚᐅᕐᒪᑕ ᐋᖅᑭᒃᓯᓇᓱᐊᕐᓗᑎᒃ ᐅᖃᖃᑎᒋᓂᖕᒥᑦ ᐅᖃᓪᓚᐅᑎᖃᕐᓗᑎᒃ ᐊᑯᓂ−ᑕᐅᕗᖓᑐᖃᒃ ᐱᓕᕆᐊᒃᓴᒧᑦ ᐸᕐᓇᖕᓃᑦ, ᓈᒻᒪᒃᑎᕋᒃᓴᐅᓂᖓ, ᐊᒻᒪᓗ ᐃᖃᓇᐃᔭᖃᑎᒌᒃᑐᓂ. ᐅᖃᐅᔾᔨᒋᐊᖅᑎᐅᖃᑕᐅᔪᑦ ᐋᖅᑭᖃᑎᒋᒃᑎᑦᑎᓚᐅᕐᒪᑕ ᐱᔭᕆᐊᑭᑦᑑᓕᖅᑎᑕᐅᖁᓪᓗᒋᑦ, ᓄᖑᑉᐸᓪᓕᐊᑎᑕᐅᖁᓇᒋᑦ, ᐊᒻᒪᓗ ᐊᐅᓚᑕᒃᓴᐅᓗᓂ ᐃᓚᒋᐊᒃᑲᓂᕈᑎᖓ ᐱᓕᕆᐊᒃᓴᒧᑦ ᐸᕐᓇᖕᓂᖅ ᐊᒻᒪᓗ ᓈᒪᒃᑎᕆᓂᖅ, ᐊᒻᒪᓗ ᖃᑦᓯᑲᓚᒪᕆᑦ ᓄᑖᕈᕆᐊᖅᓯᔪᓚᔪᑦ ᐅᖃᐅᑎᖃᓚᐅᕐᒪᑕ ᐊᑐᓕᖅᑎᑕᐅᔪᓇᑐᐃᓐᓇᕆᐊᖃᓂᖏᓐᓂᑦ ᐸᕐᓇᒍᑎᑦ ᑕᐃᒪᐃᑎᑕᐅᓗᑎᒃ ᒪᓕᒐᓕᐊᖑᔪᓄᑦ ᐊᒻᒪᓗ ᐊᐅᓚᑦᑎᓂᕐᒧᑦ ᐊᐳᖅᑕᐅᕈᑕᐅᔪᓂᑦ. ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᑦ (CanNor) ᐃᖃᓇᐃᔭᖅᑎᖏᑦ ᐊᒻᒪᓗ ᐊᓯᖏᑦ ᒐᕙᒪᑐᖃᒃᑯᓐᓂ ᑭᒡᒐᖅᑐᐃᔨᑦ ᐱᓕᕆᒋᐊᕈᓐᓇᓯᓚᐅᕐᒪᑕ ᖃᐅᔨᔭᐅᑎᑦᑎᔪᓐᓇᖅᓯᓪᓗᑎᒃ ᐊᓯᖏᓐᓂᑦ ᐊᑑᑎᖃᓂᖅᐹᓂᑦ ᑮᓇᐅᔭᖃᒃᑎᑦᑎᔾᔪᑎᓂᑦ ᐊᒻᒪᓗ ᐃᑲᔪᖅᑕᐅᔪᑎᓄᑦ ᐱᓕᕆᔾᔪᑎᓂᑦ ᐱᔭᐅᒃᓴᐅᑎᑕᐅᔪᓂᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᕈᒃᓰᕕᖁᑎᓕᕆᓂᕐᒥ ᐊᒻᒪᓗ ᓂᐅᕕᐊᒃᓴᓕᐅᕐᓂᕐᒥ−ᓂᕿᒃᓴᓕᐅᖑᓯᒪᔪᓂᑦ ᐱᒋᐊᖅᑎᑦᑎᔾᔪᑎᓂᑦ, ᐊᒻᒪᓗ ᓇᓗᓇᐃᖅᓯᓪᓗᑎᒃ ᐱᓕᕆᐊᖑᓇᓱᒋᐋᓕᖕᓂᑦ ᑐᕌᖓᔪᓂᑦ ᑕᒪᒃᑯᓄᙵᖓᔪᓂᒃ ᐱᓕᕆᔾᔪᑎᓄᑦ ᓈᒻᒪᓛᖑᖁᓪᓗᒋᑦ ᐱᔭᐅᔭᕆᐊᓕᖕᓄᑦ ᐅᑭᐅᖅᑕᖅᑐᕐᒥ ᐃᓄᖏᓐᓄᑦ.
ᐊᑑᑎᖃᓂᖅᐸᑦ ᐃᓱᒪᒃᓴᖅᓯᐅᕈᑕᐅᔪᑦ ᐱᓕᕆᐊᖑᓇᓱᒋᐋᓕᑦ ᐊᒻᒪᓗ ᐱᓕᕆᒋᐊᕐᕕᒃᓴᔪᓐᓇᖅᑐᑦ
ᐃᓘᓐᓇᓕᒫᖓᓂ ᐊᓯᕈᐃᔪᑉ ᑲᑎᒪᓯᓐᓈᕐᓂᐅᑉ, ᖃᑦᓯᑲᓚᒪᕆᑦ ᑭᐱᓪᓗᐊᖅᑕᖅᓯᔪᑦ ᐃᓱᒪᒃᓴᖅᓯᐅᕈᑎᒃᓴᐃᑦ, ᐱᓕᕆᐊᖑᓇᓱᒋᐋᓕᑦ ᐊᒻᒪᓗ ᐱᓕᕆᒋᐊᕐᕕᒃᓴᐅᓕᖅᑐᑦ ᓴᕿᓚᐅᕐᒪᑕ. ᐃᒪᐃᓘᖅᑐᓂᑦ ᑐᓴᓚᐅᖅᐳᒍᑦ.
ᓱᒃᑲᐃᑦᑐᑦ ᐊᒻᒪᓗ ᑲᑦᑐᖓᐃᑦᑐᑦ ᓵᓚᒃᓴᓱᖑᒪᑕ ᓴᒃᑲᓕᓂᑭᓴᐅᑎᓂᕐᒥ: ᐅᑭᐅᖅᑕᖅᑐᕐᒥ ᓂᕿᒃᓴᖃᑦᑎᐊᓂᖅ "ᐋᖅᑭᒃᑕᐅᔪᓐᓇᖏᒻᒪᑦ ᓯᐅᕕᕆ ᐋᖅᑭᖕᒧᑦ." ᐊᑯᓂ−ᑕᐅᕗᖓᑐᖃᒃ ᐱᓕᕆᐊᒃᓴᖅ ᐱᓕᕆᐊᖑᔪᒪᓪᓚᕆᒃᑐᖅ ᐊᑐᓚᕆᓕᖅᑎᑕᐅᔪᓐᓇᕐᒪᑕ ᕿᓚᒻᒥᐅᔪᒃᑯᑦ−ᐊᑐᕐᓂᖏᑎᒍ, ᐃᓚᒋᐊᒃᑲᓂᕈᑎᖏᑎᒍ, ᐊᒻᒪᓗ ᐊᑐᕈᓇᓚᕆᒃᑐᑎᒍ ᐸᕐᓇᒍᑎᖃᕐᓂᒃᑯᑦ. ᐱᒋᐊᕈᑎᖃᕐᓗᓂ ᒥᑭᔪᒥᑦ ᐊᒻᒪᓗ ᐊᖏᒡᓕᕙᓪᓕᐊᓕᕐᒥᓗᒍ ᐊᐅᓚᑦᑐᓐᓇᕐᓗᒍ ᖃᓄᐃᓕᕙᓪᓕᐊᓂᖓ.
ᐊᒥᓲᓗᐊᖅᑐᐋᓗᖕᓂᑦ ᓂᕿᓕᐅᖅᑎᖃᕐᒪᑦ ᐊᐅᓚᑦᑎᓂᐅᑉ ᑰᖃᕐᕕᖓᓂ: ᐱᕙᓪᓕᐊᑦᑎᐊᕐᓂᖅ ᐊᒃᓱᐊᓗᒃ ᐱᔭᕐᓂᖏᑦᑐᐋᓗᔪᓐᓇᕐᒪᑦ ᒪᑯᓇᓂ ᐊᒥᓱᓂᑦ ᐃᒻᒥᒃᑰᖓᔪᓂᒃ ᐊᐅᓚᑦᑎᓂᖃᑉᐸᑕ ᐋᖅᑭᒃᓱᖅᓯᒪᓂᖏᓐᓂ, ᓲᕐᓗ ᓂᕿᓕᕆᓂᕐᒧᑦ ᒪᓕᒃᑕᐅᔭᕆᐊᖃᒃᑎᑕᐅᔪᓂ, ᐅᕝᕙᓘᓐᓃᑦ ᓇᖕᒥᓂᖁᑎᓄᑦ ᐱᓕᕆᔪᓐᓇᐅᑎᖃᕆᐊᖃᒃᑎᑦᑎᓂᕐᒥᑦ, ᐱᓗᐊᙳᐊᖅᑐᒥᑦ ᐊᑕᐅᓯᐅᖏᑦᑐᑦ ᒐᕙᒪᐃᑦ ᐱᖃᖃᑎᒋᒃᑐᐃᓐᓇᐅᒃᐸᑕ ᐱᓕᕆᔪᓐᓇᕐᓂᖃᕕᒋᔭᒥᖕᓂᑦ ᓇᓗᓇᐃᖅᓯᔪᐃᓐᓇᐅᖏᓪᓗᑎᒡᓗ ᐊᔾᔨᒌᓂᑦ ᐋᖅᑭᒃᓱᖅᓯᒪᔪᓂᑦ ᑎᑭᑕᐅᔪᒪᔪᓂᑦ ᐊᒻᒪᓗ ᐱᓕᕆᐊᕆᔪᒪᔭᖏᓐᓂᑦ. ᐱᓕᕆᖃᑎᖃᒃᑎᓪᓗᒋᑦ ᓄᓇᓕᓕᕆᔨᒃᑯᓐᓂᑦ, ᓄᓇᓕᖃᕕᐅᔪᒥᑦ, ᐊᒻᒪᓗ ᒐᕙᒪᑐᖃᒃᑯᑦ ᐃᓕᕆᕕᖏᑦ, ᐊᑐᓂ ᐱᖃᑐᐃᓇᐅᒃᐸᑕ ᐱᓕᕆᔪᓐᓇᕐᓂᖃᕕᖃᓂᕐᒥᖕᓂᑦ ᖃᓄᐃᓕᖓᓂᖓᓂᑦ ᐱᓕᕆᐊᒃᓴᐅᑉ, ᐊᖏᒡᓕᑎᑦᑎᓗᐊᖅᑐᐋᓗᔪᓐᓇᕐᒪᑕ ᐃᖃᓇᐃᔭᕐᕕᖁᑎᐅᑉ ᐱᓕᕆᔾᔪᑎᒋᔪᓐᓇᖅᑕᖏᓐᓂᑦ.
ᑭᓯᐊᓂ ᐱᑕᖃᒻᒥᔪᖅ ᐱᒋᐊᕐᕕᒃᓴᐅᔪᒥᒃ ᑕᕝᕙᓂ ᖃᓕᕇᓕᕐᕕᐅᓯᒪᔪᒥ. ᓇᓂᓯᓗᓂ "ᐃᖃᓇᐃᔭᕐᕕᒋᔭᒥ ᐱᓕᕆᑦᑎᐊᕈᓐᓇᖅᑐᖁᑎᒥᑦ", ᑭᒡᒐᖅᑐᐃᔨᖃᕐᓗᓂ ᐃᓗᐊᓂ ᐊᑐᓂ ᐊᔪᙱᓕᕇᑦ ᒐᕙᒪᒃᑯᓐᓂ ᐱᔪᒪᓂᖃᕐᕕᒋᓗᒍ ᐊᒻᒪᓗ ᐱᓕᕆᑦᑎᐊᕈᓐᓇᕐᓂᖃᕐᕕᒋᓗᒍ ᐱᓕᕆᐊᒃᓴᖅ, ᐃᑲᔪᕈᓐᓇᕐᒪᑦ ᐊᓂᒍᐃᑎᓐᓂᐋᕐᓗᒍ ᐊᐅᓚᑎᓂᖃᕐᕕᐅᔪᑎᒍ ᐅᕝᕙᓘᓐᓃᑦ ᒪᓕᒃᑕᐅᔭᕆᐊᓕᒃᑎᒍ ᐊᐳᖅᑕᕈᑕᐅᓲᒃᑯᑦ ᐅᖁᒪᐃᒃᓴᓗᐊᓕᖅᑎᑕᐅᖏᓪᓗᓂ ᐃᖃᓇᐃᔭᕐᕕᖁᑎᐅᑉ ᐱᓕᕆᔪᓐᓇᕐᓂᖓ. ᐃᑲᔪᖅᑎᑎᐅᓂᕐᒧᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨ (CanNor) ᖁᕕᐊᓱᖕᒪᑦ ᐃᑲᔪᕋᓱᐊᕈᒪᓪᓗᓂ ᐊᔾᔨᒌᖏᑦᑑᑎᓄᑦ ᐊᔪᖏᓕᕇᓄᑦ ᐊᒻᒪᓗ ᓇᓪᓕᐊᖕᓃᑦᑐᓄᑦ ᒐᕙᒪᒃᑯᓐᓄᑦ ᐋᖅᑭᓯᖃᑎᒋᓇᓱᐊᕈᒪᓪᓗᒋᑦ ᑲᑎᒪᖃᑎᒋᓂᐊᕐᓗᒋᑦ ᐊᒻᒪᓗ ᓄᑖᕈᕆᐊᖅᓯᔪᓚᔪᑦ ᐅᖃᕐᕕᖃᕈᓐᓇᓪᓗᒋ ᐃᑲᔪᕈᓐᓇᕋᔭᖅᑐᓂᑦ ᐱᔪᓐᓇᕐᓂᓕᖕᓂᑦ.
ᐱᑕᖃᖏᒻᒪᑦ ᐊᔪᕆᒃᓯᐅᔾᔨᓯᒪᔪᓂᒃ ᓇᐅᒃᑰᕆᐊᖃᕐᒪᖔᑕ ᐋᖅᑭᒋᐊᖅᓯᓂᐊᕐᓗᑎᒃ: ᐃᓕᖅᑯᓯᓚᕆᖓ ᐱᓕᕆᐊᕆᓇᓱᐊᓕᕐᓗᒋᑦ ᐱᓕᕆᔾᔪᓯᐅᓕᖅᑐᒧᑦ ᐱᓕᕆᐊᒃᓴᒧᑦ ᑐᑭᖃᕐᒪᑦ ᐱᑕᖃᖏᓐᓂᖏᓐᓂᑦ ᐱᓕᕆᒋᐊᐳᓯᐅᓲᓂᑦ ᒪᓕᒃᑕᐅᔪᓐᓇᕋᔭᖅᑐᓂᒃ ᐱᓕᕆᐊᖑᔪᓕᒫᑦ ᓈᒻᒪᑦᑎᐊᖅᑐᒃᑰᕋᓗᐊᕐᒪᖔᑕ ᐱᓕᕆᐊᖑᓴᓱᐊᓂᖏᑎᒍ. ᑭᓯᐊᓂ, ᑕᐃᒫᖑᓯᒪᓂᑐᐃᓐᓇᖓᓄᑦ ᑕᐃᒃᑯᐊᓪᓗᐊᖅ ᐱᓕᕆᐊᒃᓴᐃᑦ ᐱᓕᕆᐊᖑᓚᐅᖅᓯᒪᑎᓐᓇᒋᑦ ᖃᓄᐃᓘᕐᓗᒋᑦ ᐱᓕᕆᐊᖑᓗᑎᒃ ᑐᑭᖃᓕᖅᑎᑦᑎᖏᒻᒪᑦ ᖃᐅᔨᕕᒃᓴᐅᖏᓐᓂᖓᓂᑦ ᐃᓕᑕᐅᔪᓐᓇᕋᔭᕐᓂᖓᓂᑦ ᐊᓯᐊᓃᒃᑲᔭᕐᓂᕋᓗᐊᖅᐸᓪᓘᓐᓃᑦ. ᖃᐅᔨᒋᐊᕐᓗᓂ ᐊᓯᖏᓐᓄᑦ ᐱᓕᕆᔪᓐᓇᕐᓂᖃᕐᕕᐅᔪᓄᑦ, ᐊᓯᖏᓐᓄᑦ ᐃᒻᒥᒃᑰᖓᓂᐅᔪᓄᑦ, ᐊᒻᒪᓗ ᐊᒡᓛᓪᓗᓂᑦ ᓇᖕᒥᓂᖁᑎᒋᔭᐅᔪᓄᑦ ᖃᐅᔨᒪᔾᔪᑎᒃᓴᓄᑦ ᐃᑲᔪᕈᓐᓇᕐᒪᑕ ᐃᓗᑦᑎᖅᓯᔾᔪᑕᐅᒐᔭᕐᓗᓂ ᐱᓕᕆᔾᔪᓯᕆᓕᖅᑕᖓᓄᑦ ᓴᓇᔭᒃᓴᖁᑎᐅᑉ ᐱᓕᕆᐊᖑᕙᓪᓕᐊᕕᒋᒐᔭᖅᑕᖓᓄᑦ ᐱᓕᕆᐊᖑᕙᓪᓕᐋᑎᓪᓗᒍ. ᐃᖃᓇᐃᔭᖃᑎᒌᖕᓂᖅ, ᐊᒡᓛᓪᓗᓂᑦ ᐊᑭᑦᑐᕋᐅᑎᖃᑎᒋᒐᔭᕋᓗᐊᕐᓗᒋᑦ, ᓴᕿᑎᑦᑎᔪᓐᓇᑐᐃᓐᓇᕆᐊᖃᕐᒪᑦ ᐃᑲᔪᕐᓂᖃᕈᓐᓇᒪᕆᒃᑲᔭᖅᑐᒥᒃ ᐱᓕᕆᖃᑎᒌᓕᓂᕐᒨᖓᔪᒥᒃ. ᐅᖃᐅᔾᔨᒋᐋᖅᑎᐅᓂᕐᒧᑦ ᑲᑎᒪᔨᕋᓛᖑᖃᑕᐅᓗᓂ ᐃᓱᒪᒋᖃᓯᐅᑎᓗᒍ, ᓱᖁᑕᐅᖏᒻᒪᑦ ᒥᑭᔫᒐᓗᐊᒥᒃ "ᐱᓕᕆᖃᑎᒌᓪᓄᓂ−ᐊᑭᑦᑐᕋᐅᑎᓂᖅ."
ᑕᒪᐅᓇᑦᑕᐃᓐᓈᕋᓗᐊᖅᑎᓪᓗᒋᑦ ᐊᑐᖅᑕᐅᔪᑎᒍ, ᐱᓕᕆᐊᒃᓴᐃᑦ ᖃᐅᔨᒪᓇᖏᑦᑐᒃᑰᖅᑎᓪᓗᒋᑦ ᓂᕆᐅᒋᔭᐅᖕᒪᑕ ᐊᐳᖅᑕᕈᑎᖃᓂᐊᖅᑐᕆᔭᐅᓪᓗᑎᒃ ᐅᕝᕙᓘᓐᓃᑦ ᐱᔭᕐᓂᖏᑦᑐᑎᒎᖃᑦᑕᕐᓂᐊᖅᑐᕆᔭᐅᓪᓗᑎᒃ ᓇᐅᒃᑰᕐᕕᒃᓴᖅᓯᐅᖅᑎᓪᓗᒋᑦ ᐱᕈᒃᐸᓪᓕᐊᓇᓱᐊᓂᖏᓐᓂ ᐊᒻᒪᓗ ᒪᑭᑕᑦᑎᐊᖁᓐᓇᖅᓯᕙᓪᓕᐊᑎᓪᓗᒋᑦ. ᖃᓄᐃᓕᕙᓪᓕᐊᓇᖅᑐᖅᓯᐅᕐᓗᓂ ᐊᒻᒪᓗ ᖃᐅᔨᔭᐅᑎᖃᑦᑕᕐᓗᒋᑦ ᑲᔪᓯᑦᑎᐊᕐᓂᕆᔭᐅᔪᑦ, ᐱᔪᓐᓇᐃᓕᓂᐅᔪᑦ, ᐱᓕᕆᓇᓱᐊᒐᕆᐊᖃᓃᑦ ᐊᒻᒪᓗ ᐱᒋᐊᕐᕕᒃᓴᐅᓕᓂᖏᑦ ᐊᖏᔪᐋᓗᖕᒥᑦ ᐱᕚᓪᓕᕈᑕᐅᔪᓐᓇᕐᒪᑕ ᐊᓯᑦᑎᓐᓄᑦ ᐱᔪᒪᔭᐅᓗᐊᙳᐊᖅᑐᓂᒃ ᓄᑖᕈᕆᐊᖅᓯᒧᒪᔪᓄᑦ ᐊᒻᒪᓗ ᖃᐅᔨᕚᓪᓗᒐᓱᐊᖅᑐᓄᑦ ᐊᑐᐋᖅᓯᔪᓄᑦ ᑕᒪᑐᒥᖓᑦᑕᐃᓐᓇᖅ ᐊᑐᖅᑕᑦᑎᓐᓂᑦ.
ᐱᓕᕆᐊᒃᓴᐃᑦ ᐱᕚᓕᖅᑎᑦᑎᖕᒪᑕ ᓄᓇᓕᖕᓂᑦ ᐱᕚᓪᓕᖅᑎᑦᑎᓪᓗᑎᒃ ᐱᓕᕆᐊᒃᓴᓂᑦ: ᐃᓘᓐᓇᓕᒫᖓᓂ ᐱᓕᕆᐊᖑᕙᓪᓕᔪᖅ 1−ᒥ ᓄᑖᕈᕆᐊᖅᓯᔪᒪᔪᑦ ᖃᐅᔨᓇᖅᓯᑎᑦᑎᓚᐅᕐᒪᑕ ᐊᒃᓱᐋᓗᒃ ᐊᒥᓲᓂᖏᓐᓂᑦ ᓄᓇᓕᖕᒥ ᐱᓕᕆᖃᒌᖕᓂᖅ ᐊᒻᒪᓗ ᐱᓕᕆᖃᑕᐅᓃᑦ, ᐊᒻᒪᓗ ᑕᐃᒫᒃ ᐱᓕᕆᐊᒃᓴᖏᑦ ᐱᔭᐅᑎᑦᑎᖕᒪᑕ ᑕᖏᓕᖕᓂᑦ ᐱᕚᓪᓕᕈᑎᓂᒃ ᓄᓇᓕᖏᓐᓄᑦ, ᑕᐃᒪᐃᑎᑦᑎᖕᒥᔪᑦᑕᐅᖅ ᐱᓕᕆᑦᑎᐊᕈᓐᓇᕐᓂᕆᔭᐅᔪᑦ, ᖃᐅᔨᒪᓂᕆᔭᐅᔪᑦ, ᐊᒻᒪᓗ ᐱᓕᕆᔪᓐᓇᕐᓂᕆᔭᖏᑦ ᑎᑭᑦᑐᒪᔭᖏᑕ ᓄᓇᓕᒃ ᐱᕚᓪᓕᖅᑎᑦᑎᖕᒥᖕᒪᑕ ᐱᓕᕆᐊᒃᓴᖁᑎᒥᖕᓄᑦ. ᑕᐃᒫᒃ ᐅᑭᐅᖅᑕᖅᑐᕐᒥ ᓂᖀᓂᒃ ᐋᖅᑭᒋᐊᖅᓯᓂᕐᒧᑦ ᐱᓕᕆᓇᓱᒋᐊᖃᕐᓂᑦ ᐋᖅᑭᒃᓱᖅᐸᓪᓕᐊᑎᓪᓗᒋᑦ ᑐᕌᕐᓗᑎᒃ ᐱᓕᕆᐊᖑᓂᖓ 2−ᒧᑦ, ᓄᑖᕈᕆᐊᖅᓯᔪᒪᔪᑦ ᐱᓕᕆᔭᕆᐊᖃᓕᖅᑎᑕᐅᓂᐊᕐᒪᑕ ᐊᑐᓕᖅᑎᑦᑎᔭᕆᐊᖃᓕᕐᓗᑎᒃ ᐱᓕᕆᐊᒃᓴᖁᑎᒥᖕᓂᒃ ᐊᒃᓲᓂᖅᓴᖅ ᐱᓕᕆᐊᖑᔭᕆᐊᖃᓕᕐᓗᑎᒃ. ᐊᖏᓂᖅᓴᐅᓕᖅᑎᑦᑎᓃᑦ ᑕᒪᒃᑯᓂᖓ ᓄᓇᓕᖕᒥ ᐃᖃᓇᐃᔭᖃᑎᒋᒃᑐᓂ, ᐱᓗᐊᙳᐊᖅᑐᒥᒃ ᒪᑯᓇᓂ ᐊᒻᒪᓗ ᐊᔾᔨᒌᖏᑦᑑᑎᓂ ᓄᑖᕈᕆᐊᖅᓯᒧᒪᔪᓂ, ᐱᔭᐅᔭᕆᐊᖃᓚᕆᖕᓂᐊᓕᕐᒪᑕ ᐱᔭᐅᓚᕆᖁᓪᓗᒋᑦ ᐋᖅᑭᒃᓱᖅᑕᐅᔪᓐᓇᕐᓂᖏᑦ ᐱᓕᕆᐊᒃᓴᐃᑦ ᐊᕕᒃᑐᖅᓯᒪᐅᓂᐅᑉ ᐋᖅᑭᒃᓯᒪᓂᖏᓐᓄᑦ ᐊᒻᒪᓗ ᐅᖓᑎᒃᑲᓂᒪᕆᐋᓄᑦ.
ᓴᓇᓚᐅᕈᒃ ᑐᓴᖅᑕᐅᑎᑦᑎᔾᔪᑎᒋᓇᓱᐊᖅᑕᐃᑦ ᒫᓐᓇ: ᑕᐃᒪᓕ ᐱᓕᕆᐊᒃᓴᐃᑦ ᐊᖏᒡᓕᕙᓪᓕᐊᑎᓪᓗᒋᑦ, ᐱᔭᐅᑎᑕᐅᓲᖑᖕᒪᑕ ᐊᒻᒪᓗ ᑐᒃᓯᕌᖑᓪᓗᑎᒃ ᐊᒻᒪᓗ ᑐᑭᓯᓇᖅᓯᑎᑕᐅᓪᓗᑎᒃ ᐊᒥᓱᐋᓗᖕᓄᑦ ᖃᓄᐃᑦᑐᑐᐃᓇᕐᓄᑦ ᐊᔾᔨᒌᖏᑦᑑᑎᓄᑦ ᑐᓴᕋᓐᓈᕆᐊᖅᑐᖅᓯᒪᔪᓄᑦ; ᒐᕙᒪᒃᑯᓐᓂ ᑎᒥᐅᔪᓄᑦ, ᐊᐅᓚᑦᑎᔨᐅᔪᓄᑦ, ᑮᓇᐅᔭᖃᒃᑎᑦᑎᔪᓐᓇᑐᐃᓇᕆᐊᓕᖕᓂᑦ, ᓄᓇᓕᖕᓂᒥᐅᑕᐅᖃᑕᐅᔪᓂᑦ, ᓴᓇᕕᖕᓂ ᐊᑭᑦᑐᕋᐅᑎᔪᓂᑦ – ᓄᑖᕈᕆᐊᖅᓯᔪᒪᔪᑦ ᐱᔭᐅᑎᑦᑎᔪᓐᓇᕆᐊᖃᕐᒪᑕ ᐱᓕᕆᐊᒃᓴᖁᑎᒥᖕᓂᑦ ᑭᒃᑯᓕᒫᓄᑦ. ᑕᐃᒪᐃᒃᑲᓗᐊᖅᑎᓪᓗᖑ, ᐊᑐᓂ ᑐᓴᕋᓐᓈᕆᐊᖅᑐᖅᓯᒪᔪᑦ ᕿᓂᕐᓂᐊᕐᒪᑕ ᐊᔾᔨᒋᖏᑕᖏᓐᓂᑦ. ᓄᓇᓕᖕᓂ ᐃᖃᓇᐃᔭᕐᕕᖁᑎ ᖃᐅᔨᔪᒪᑐᐃᓐᓇᕆᐊᖃᕐᒪᑦ ᑕᐃᒃᑯᓂᖓ ᓄᓇᓕᖕᒥ ᐱᕚᓪᓕᕈᑕᐅᔪᓐᓇᖅᑐᓂᒃ, ᑕᐃᒃᑯᐋᓕ ᐱᑎᑦᑎᔪᓐᓇᑐᐃᓇᕆᐊᓕᒃ ᐃᒻᒥᓂᖅᓱᖅᑐᑦ ᑮᓇᐅᔭᖃᒃᑎᑦᑎᔪᓐᓇᖅᑐᑦ ᐱᓕᕆᔾᔪᑎᖃᕈᒪᓗᐊᑐᐃᓐᓇᕆᐊᖃᕐᒪᑦ ᑕᓱᕋᔭᖅᑕᒥᓂᑦ ᐊᑐᕈᒫᕐᓂᐊᖅᑐᓕᐅᕈᑎᒋᔭᒥᓂᑦ.
ᓄᑖᕈᕆᐊᖅᓯᔪᒪᔪᑦ ᐱᓕᕆᑦᑎᐊᕋᓱᒋᐊᖃᕋᓗᐊᕐᒪᑕ ᐋᖅᑭᒃᓯᓇᓱᐊᖅᑎᓪᓗᒋᑦ "ᐋᖅᑭᒃᓱᐃᑦᑎᐊᕋᓱᐊᕐᓂᕐᒥᖕᓂᑦ ᑐᓴᖅᑕᐅᑎᓐᓇᓱᐊᖅᑕᖏᓐᓂᑦ" ᐱᒋᐊᓕᕋᑖᕐᓂᕐᒥᖕᓂ; ᐋᖅᑭᒃᓱᑦᑎᐊᑦᖤᐅᑎᒋᓗᓂᒋᑦ ᒫᓐᓇ, ᓇᓗᓇᐃᑦᑎᐊᕐᓗᓂᒋᑦ ᐱᖃᒃᑎᐅᖃᑕᐅᔪᓄᑦ ᐋᖅᑭᒃᓱᖅᓯᒪᖃᑎᒌᖕᓂᐅᓂᐊᖅᑐᑦ, ᓇᓗᓇᐃᔭᕐᓗᓂᒋᑦ ᐱᓕᕆᐊᖑᓇᓱᐊᖅᑐᑦ, ᐱᓕᕆᐊᖑᔭᕆᐊᓕᒃ, ᐊᒻᒪᓗ ᐋᖅᑭᒃᓱᖅᓯᒪᓂᐅᖁᒐᔭᙳᐊᖅᑕᖏᑦ, ᐊᒻᒪᓗ ᐱᓯᒪᓗᓂ ᖁᕝᕙᕆᐊᖅᑎᑦᑎᔾᔪᑎᒋᔪᓐᓇᕋᔭᖅᑕᖓᓂᑦ ᐱᓯᒪᑦᑕᐅᑎᒋᓗᒋᑦ, ᓈᒻᒪᒃᑎᕋᓱᐊᑐᐃᓐᓇᖏᓪᓗᒍ ᐊᑑᑎᖃᓂᖅᐹᖅ ᑐᓴᖅᑕᐅᑎᑦᑎᔾᔪᑎᒋᓇᓱᐊᖅᑕᖓ ᐱᓕᕆᐊᒃᓴᖅ ᐋᖅᑭᒍᑎᕙᓪᓕᐋᓕᖅᑎᓪᓗᒍ.
ᓯᕗᒧᐊᒃᐸᓪᓕᐋᓂᖅ
ᖁᔭᒋᕕᒡᔪᐊᕐᓗᒋᑦ ᐃᓘᓐᓇᑎᒃ ᓄᑖᕈᕆᐊᖅᓯᔪᒪᔪᑦ ᐊᒻᒪᓗ ᐅᖃᐅᔨᒋᐋᖅᑎᓂᑦ ᑲᑎᒪᔨᕋᓛᖑᖃᑕᐅᔪᑦ ᑕᐃᒃᑯᐊ ᐱᓕᕆᖃᑕᐅᓚᐅᖅᑐᑦ ᐊᑐᕐᓂᓕᒫᖏᓐᓂ ᐱᖓᓱᑦ ᑲᑎᒪᓯᓐᓈᕐᓂᐅᔪᓂ; ᑕᐃᒃᑯᐊ ᓯᕗᓪᓕᐅᓚᕐᒪᑕ ᑕᐃᒪᓇᐃᑦᑐᓂ ᑲᑎᒪᓯᓐᓈᕈᑎᖏᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᑎᑦᑎᓂᕐᒥ ᑭᒡᒐᖅᑐᐃᔨᑦ (CanNor) ᑲᑎᒪᓯᓈᖅᑎᑦᑎᓂᕆᓚᐅᖅᑕᖏᓐᓂ. ᑭᒡᒐᖅᑐᐃᔨᐅᔪᑦ ᖁᕕᐊᒃᑐᑦ ᑕᕝᕙᓃᑦᑐᓕᒪᑦ ᐅᖃᒃᑕᐃᓕᓚᐅᖏᓂᖏᓐᓂᑦ, ᖃᓄᑐᐃᓐᓈᕈᓐᓇᕐᓂᖏᓐᓂᑦ, ᐊᒻᒪᓗ ᐃᓂᖃᒃᑎᑦᑎᑎᐋᓚᐅᕐᒪᑕ ᑕᒪᐅᓇᖅᑎᓪᓗᒋᑦ ᐱᖃᖃᑎᒌᒍᓐᓇᕐᓗᑎᒃ ᑐᓴᐅᒪᔪᑎᒃᓴᓂᒃ, ᓯᓚᑐᓂᐅᔪᓂᒃ, ᐊᒻᒪᓗ ᐱᓕᕆᑦᑎᐊᕈᓐᓇᕐᓂᕐᓂᑦ.
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: